entervista deu Ciril Joanin, membre dirigent de l'organizacion politica Assemblada Occitana

Ciril JOANIN es nissart despí dau 2005, emb de familha en Provença e d'originas dromenca dau costat pairal e arriegés costat mairal. Militant occitanista despí mai de 10 ans, dirigent de l'associacion culturala Nissa Pantai, president de la Calandreta Nissarda que ven tot bèu just de si crear, e enfin membre dirigent dau movement politic Assemblada Occitana.


E'ns pòts diser, de manera sintetica, dens quin encastre s'ei apitada l'assemblada? Quan? Dab qui? E perqué?


En lo 2012, parteriam dau constat que lo nivèu d'alienacion de la populacion d'Occitània tota èra tau qu'aquela èra pas lèsta d'acceptar e d'integrar l'idèa de lucha occitana per l'emancipacion nacionala, lo drech a l'autodeterminacion ò mai a l'independéncia. La fauta a de decennis de jacobinisme, de propaganda supremacista francesa e d'opressions lingüistiqui. Aquesto blocatge si sente e mai dins lo mitan culturalista occitan, fòrça timorós a pena que si parla d'independéncia. Per que l'independentisme occitan si desvolope, cau passar per la casa promiera qu'es aquela de la conscientizacion dei massas per l'informacion e l'aligança de toti li fòrças vivi de l'occitanisme, tant politic coma cultural, darrier aquel objectiu.

Es ensin qu'en lo 2013 si desvolopèt l'idèa de crear un movement occitan larg e transversal sus lo modèl de l'Assemblea Nacional Catalana (ANC). An aquela ocasion organizeriam un rescòntre embau Centre dei Catalans de Lausana e finda d'escambis emb de membres de l'ANC per n'estudiar lo foncionament. Pi s'organizèron en lo 2015 tres amassadas successivi a Rodés, Montpelhièr pi Marselha per redigir ensems emb de militants occitans de toti tendéncias (PNO, PÒC, Libertat, independents...) lu estatuts de la futura associacion.

L'Assemblada Nacionala Occitana (ANÒC) es estada oficialament fondada en març dau 2016. Es un grop de defensa d'interès, valent a dire un grop d'influéncia que cèrca de faire pression sus lu poders publics en recorrent a l'opinion publica. Cen que lo diferéncia d'un lobby que cèrca d'influenciar dirèctament de personas ò institucions de poder sensa passar per l'opinion publica. En lo 2019, l'ANÒC es devenguda Assemblada Occitana (AO), per simplificacion dau nom, sensa abandonar la dimension nacionala e independentista dau sieu objècte.


E defen, l'Assemblada, un projècte particular per Occitania o e's concentra sus ua activitat de conscientizacion/informacion?


L'Assemblada Occitana a definit de finalitats clari que son la reconoissença de la nacion occitana e la restauracion de la sieu dignitat. Considèra que sola l'independéncia permeterà d'obtenir aquelu objectius legitims. Defende un projècte d'Occitània liura, emb una entitat territòriala pròpria rassemblant toi lu país de lenga occitana, una economia sobeirana, dinamica, sociala e ecologica. E de valors democratiqui e umanisti tali coma son definidi dins lo comunicat dau 06.06.2018.

D'efiech, vist que lo nivèu d'alienacion de la populacion d'Occitània e la situacion actuala de l'occitanisme politic, l'AO si concentra per aüra sus l'activitat de conscientizacion per l'informacion.


A titol individuau, quau punt de vista as sus l'Occitanisme politic?


Coma lo sabèm toi, l'occitanisme politic travèrsa una crisi grèva despí lo principi dei ans 2010, emb la presisténcia dei mesmes blocatges que la caracterizan: divisions, passivitat, replecs localistas, envielhiment de la basa militanta...

La crisi de l'occitanisme es estada mençonada mantu còups dins Jornalet e a fach l'objècte d'un dorsier complet de l'Assemblada Occitana. Siguèt tanben un dei tèmas dei Promieri Jornadas Internacionalisti d'Occitània dins li quali ai augut l'onor e lo plaser de participar coma convidat.

Nòti pura que lo mitan politic occitan a pilhat consciéncia d'aquela situacion de crisi e mai avèm assistit recentament a d'evolucions encoratjanti, especialament pendent li darrieri eleccions regionali dau 2021. Parli en particular de la lista electorala "Òc per Provença" a la quala ai participat. Aquesta lista èra excepcionala per tres rasons:

1 - A capitat a reünir de militants occitanistas de tendéncia divèrsi de costuma antagonisti: independentistas, federalistas, culturalistas etc.
2 - S'agissia d'una lista occitanista autonòma, sensa la manmesa d'un partit politic jacobin
3 - A realizat mai dau 2% de votz, cen qu'es una escomessa dei gròssi se tenèm còmpte de la manca de mejans e dei condicions dubitoï dins li quali s'es facha la campanha electorala (abséncia de distribucion dei professions de fe dins mantu endrechs).

Siam pas encara sortits de la crisi de l'occitanisme, mas li son de signes encoratjants sus dei quaus devèm reagir.


Despuish quauquas annadas las iniciativas que's multiplican per ensajar d'arrecampar los occitanistas a l'entorn de plataformas dedicada a la defensa de la lenga (Corsa per la lenga en Gasconha, colectiu biarnés per los drets de la lenga,...). E pensas ei ua bona o maishanta estrategia? Ensaja l'Assemblada de politizar aqueras menas d'iniciativas?


Pensi que tota iniciativa per defendre la lenga es bòna e que la cau provar. Aquela idèa de plataforma dedicada a la defensa de la lenga es excellenta e la cau menar. Se marcha, e viva! Se marcha pas, caurà trobar una autra estrategia. Pensi que serà un succès. Li a pas de rason que marche pas.

L'Assemblada Occitana sosten naturalament tota accion ambicioa que vague dins aqueu sens, especialament en lo faguent saupre a un maxim de mond per l'informacion, lu comunicats de sostens.


Acabam per l'actualitat: e i a un posicionament de l'Assemblada cap a las tematicas sociaus actuaus qui mobilizan numeros.osas occitans.as hens las carrèras: pass sanitari, refòrma de las retiradas, allocacion caumatge?


L'Assemblada Occitana comunica essencialament sus de tematicas sociali, societali, ecologisti, economiqui e autri que pertòcan Occitània tota. A recentament desvolopat de projèctes d'assembladas territoriali per tractar de problematicas mai locali.

Lu posicionaments de l'Assemblada Occitana parton obligatòriament sus la basa dei valors democratiqui e umanisti que defende. Per li tematicas sociali evocadi, l'Assemblada Occitana sosten naturalament li luchas sociali e combate doncas toti li mesuras de natura antisociali e liberticidi.

 

Legit 800 còps
More in this category: « E.Philippe et le 49.3
Top
We use cookies to improve our website. By continuing to use this website, you are giving consent to cookies being used. More details…