Quauquas setmanas a l’associacion Ligams, qui gavida l’eveniment gigant de La Passem, ua corsa qui’s passeja en ua partida cada còp mei espandida de Gasconha, qu’anonciè l’annulacion, puish lo repòrt de la corsa per la lenga occitana.

Totun lo tribalh realizat per cada sector ne serà pas a jetar a las ortegas. En efèit, tà l’edicion 2021 l’organizacion que conta guardà’s lo percors previst, qu’ei a díser las medishas comunas e los medish oraris de passatge. De mei, la màger part deus crompaires n’an pas demandat a estar remborsat e qu’espereràn l’edicion seguenta. La data n’ei pas enqüèra trencada au conselh d’Administracion de Ligams mes que prevéden de s’i tornar au mes de mai, tostemps sus 72ò de corsa en fin de setmana dab un despart a Pau e ua arribada a Anglet.

L’intervencion malurosa de la pandemia deu covid-19 – qui a avut totun consequéncias mei grèus que l’anulacion d’eveniments atau – que permeterà de perlongar lo periòde de reflexion e d’elaboracion de projèctes novators pertocant la transmission de la lenga entà participar a l’aperet a projècte.

Ligams que publiquè quauques setmanas a « La Passem confinada », un montatge d’un centenat de videòs hèitas a casa peus qui averén volut córrer e qui estón obligat d’ac har simbolicament, o meilèu, numericament.





Au-delà deu repòrt d’aqueth eveniment important per la lenga, que’ns podem demandar quau ei l’impacte de l’embarrament sus la practica de la lenga. Que serà mauaisit d’obtiéner chifras aquiu dessús de tant que la question n’interessa pas briga los grans médias ni tanpòc los instituts de sondatge.

Impossible donc de poder, en abséncia de dadas estatisticas estenudas, de poder respóner, en dehòra de l’ipotetic, a las questions seguentas :

A avuda, la pandemia, un impact sus la disparicion deus locutors vielhs ?

En espiar la mapa de las contaminacions e deus mòrts, que vedem que l’Occitania ei diferament tocada per la pandemia. Los Pais vivaro-alpencs e Provença que pateishen mei l’epidemia que la Gasconha, lo Lengadòc e lo Lemosin on ua partida gran de las entradas a l’espitau son mei que mei francés o alsacians vienguts deu Nòrd-Est de l’Estat per solatjar los espitaus d’acerà.

L’emplec de la lenga e s’ei ahortit entaus locutors en las zònas de présencia hòrta de la lenga?

Aquiu, a despart de testimonatges singulars, ne podem pas tirar conclusions chifradas tanpòc. Solide, hens las familhas qui asseguran ua transmission de la lenga, lo hèit d’aver redusit per fòrça lo contacte dab lo francés a l’exterior de casa qu’ahorteish aquera transmission. Quan los vesins e parlan tanben la lenga, lhèu en quauques endrets familhas an coneishut un periòde de dominacion de la nosta lenga en los escambis, hasent de l’occitan la lenga deu barri, de la carrèra o deu caminòt en quauques vilatges. Arren de significatiu donc, mes l’estanc deus desplaçaments a podut, tà daubuns, ahortir l’emplec de la lenga o lo son temps d’expausicion.

Quin ligam an entertienut los mainats dab la lenga hens las familhas embarradas non occitanofònas ?

Aci que sabem que la comunautat ensenhaire que s’a devut virar drin soleta entà perpausar activitats en lenga a distancia. Las atruas en linha (ràdios, Oc tele, Cap’òc, Lo Congrès,…) qu’an assegurat lo servici pendent l’embarrament mes n’an pas la visibilitat de çò perpausat per la « maquina France » unilinga (Lumni, CNED, France télévisions, France infos,…). Lo govèrn francés que hiquè en plaça tot un hèish d’apèrs numerics en l’encastre de « la  nation apprenante » mes enqüèra un còp los Occitans, Bretons, Bascos, Catalans, Alsacians,… ne son pas inclusits en aqueth sistèmi, enviant enqüèra un còp la nosta cultura hens las categorias facultativa e folklorica.


Pas d’apèrs, pas de chifras, pas de budget tà la lenga occitana. L’etnocidi que’s persegueish.

Legit 126 còps
Tagged under
Top
We use cookies to improve our website. By continuing to use this website, you are giving consent to cookies being used. More details…