Eleccions estudiantas en Occitània: las listas autonòmas locaus d’esquèrra que ganhan terrenh, l’UNI tanben…


Pau:


Las listas occitano-bascas deu M22M (moviment deu 22 de març) que sorteishen gran ganhantas de las eleccions deus representants estudiants de l’UPPA (Universitat deus Pais de l’Ador).
Augan los estudiants qu’avèvan la causida mei que mei entre lo moviment qui’s ditz « gaulliste » de l’UNI, sindicat de dreta finançat per partida per « Les Republicains », moviment reaccionari, present a la Manif pour tous, e lo M22M qui arregropa estudiants deu Med’òc e deu sindicat Solidaires. Aqueth moviment que ganhè 3 sietis sus 4 drin pertot manca en Scienças on n’an pas podut depausar listas pr’amor de l’embarrament, çò ditz l’organizacion. De notar qu’en aqueth departament de scienças, 40% deus vòtes qu’èran blancs çò qui muisha un cert nivèu de consciéncia deus estudiants de cap a çò que representa l’UNI qui èra la sola lista presentada.
M22M que defen la posicion d’ua organizacion engatjada e politica au contre de listas apoliticas o reaccionàrias. Que’s diferencia tanben de las organisacions sindicaus tradicionaument basadas a París peu son localisme e la soa autonomia : qu’ei un moviment compausat a 100% per membres locaus. Aquò permet d’afichar ua politica adaptada au territòri e a la diversitat de las situacions locaus deus estudiants e de las estudiantas. Lo combat per las lengas occitana e basca qu’ei plan present hens lo programa atau com la luta contra las discriminacions, la precaritat, las dominacions, la luta per un servici public de qualitat e meliorar la qualitat environamentau de l’Universitat.


Montpelhièr:


L’ADEM, associacion deus estudiants de Montpelhier que ganha lo mei gran nombre de sieti au Conselh d’estudis e de la vita universitària (6 sietis) dabant Solidaires (4 sietis) e lo SCUM (3 sietis). Las formacions francesas UNI e UNEF son darrèrs dab 2 sietis cadua e que son absentas deu conselh d’administracion de Paul Valery.


Tolosa :


A Tolosa1 Capitòli, qu’ei la lista « Bouge ta fac avec la copro arsenal et tes assos étudiantes » qui ei la mei representada (2 elegits). L’UNEF qu’a 0 elegits e l’UNI 1. A Paul Sabatier idem, que son listas locaus qui obtiénen lo mei gran nombre de collègis.
Lo contra-pes reaccionari
Las resultas globaus deu M22M o deu SCUM que trencan dab l’ambient societau actuau fascisant en Euròpa sancera. Los estudiants, mobilizats en petit nombres despuish mantuas annadas e a còps quasi absents deus moviments sociaus importants (refòrma de las retiradas, gilets jaunes,…) a despart de las efemèras marchas entau climat.
Totun que notam ua creishença deu vòte entà l’UNI. Las Universitats estant mei anar mensh accessiblas aus hilhs e a las hilhas de proletaris, que i a un taus d’emborguesiment qui prava ençò de la comunautat estudianta, çò qui explica, en partida, la manca de combativitat observada a decenia passada.
Tanben, la representacion estudianta qu’ei de relativizar quan sapim que 1% deus estudiants e de las estudiantas son sindicats.adas. e que la participacion vira a l’entorn de 10%.

Legit 1203 còps
Top
We use cookies to improve our website. By continuing to use this website, you are giving consent to cookies being used. More details…