Budget participatiu en Pirenèus atlantics : los projèctes tà l’occitan qu’an besonh de vòtes.


Lo departament deus Pireneus-atlantics (Bearn, Baish-Ador e Iparralde) que lancè augan un budget participatiu : qu’ei a díser un finançament de mantuns projèctes ciutadans com estó lo cas en d’autes departament com las Lanas l’an passat.
L’envolòpa budgetària de 1 500 000 euros qu’esquèn los e las candidats.atas en nombre. Atau, 319 projèctes qu’estón retienuts e perpausats au vòte deu public au miei deus quaus projèctes dedicats a la transmission de la lenga mes tanben projèctes environamentaus o culturaus qui intègran naturaument la preséncia de la lenga occitana çò qui muisha un interés creishent per la question linguistica en aquera petita zòna d’Occitània occidentau, la sola qui’s ganha locutors segon l’enquèsta recenta de l’OPLO.
En cada parçan, lo projècte qui receberà lo mei de vòtes que serà finançat a 100% (dinc a 50 000e per projècte) e la moneda qui sia de manca, servirà a ajudar en partida los projèctes arrivats dusau o tresau.


Aquiu quauques projèctes « occitanistas » ad ajudar se vivetz en lo departament o s’i tribalhatz o s’i estudiatz e qu’avetz mei de 11 ans.


Audiòc (nom provisòri): un lexic audio numeric en gascon a gratis. Un aper qui mancava hèra pensat entà har sortir la lenga de l’escòla e l’emplegar (un drin) en familha. Vertadera atrua pedagogica, lo lexic audio numeric, que pòt servir aus mainatges com aus adultes. Lançat per un pair d’escolan, creator de jòc vidèo, e dus regents, l’Audiòc (o Simonin deu nom de l’inventor) que’s cerca sòs entà desvolopà’s lo siti en ahortir lo nombre de tematicas, perpausar jòcs de lenga, diversificar los suppòrts d’aprentissatge e, subertot, balhar la possibilitat au monde de causir en dehòra deu gascon, lo lengadoician, lo provençau, lo nòrd-occitan, vivaro-alpenc, etc. e perqué pas mei tard lo basco, lo breton, lo catalan. Ua version experimentau qu’ei disponibla ad aquera adreça : www.dimitrisimonin.fr/lexic

Calandreta : la Calandreta paulina e lo colègi qu’an perpausat dus projèctes diferents qui’s hèn drin de concurénica suu medish parçan. La purmèra que perpausa « Avertir », un projècte de vegetalizacion de la cort de recreacion. Lo dusau que s’apèra « Esportiv’òc » e qu’a per objectiu de finançar lo futur materiau d’EPS deu colègi que deberé cambiar d’ostau enqüèra un còp.


Un percors son e imatge tà tots au casau-verdurèr d’Assat qui compta mei de 500 espècias. Perpausat per lo Conservatòri deus legumes ancians deu Bearn, lo projècte qu’ei hèra seguit e qu’enten deféner autant lo patrimòni vegetau com linguistic deu Bearn. Acompanhat d’un devís engatjat contra la privacion de las espècias comestiblas per l’economia de mercat, l’idea deu CLAB que coneish ua andada d’adesion que podem ahortir.

Que cau votar entà 3 projèctes desparièrs entà validar lo vòte en anar sus www.budgetparticipatif64.fr e en picar lo nom d’aqueths projèctes en la barra de recèrca.

Legit 7381 còps
Top
We use cookies to improve our website. By continuing to use this website, you are giving consent to cookies being used. More details…